詩中客家節目,介紹作者劉惠月的客家有聲繪本詩集,

1.2021年第一季:文化部補助-九腔十八調-臺三線產業詩歌50篇 (2020年3月出版)。

2.2021年第二季:文化部補助--八音九歌十番集50篇 (預計2021年10 月出版)。

3.文化部補助出版-醢个記憶40篇(2019年出版)。

讓客家與你更貼近 (聯絡資訊 yee.y201@gmail.com)

Powered by Firstory Hosting

看更多

所有單集

共 50 集
  • 50.枝展・葉茂・花開-記油紙傘(選自九腔十八調-台三線產業詩歌有聲書,作者劉惠月)

    2021.05.039分鐘

    50枝展・葉茂・花開-記油紙傘(大埔腔)
     (選自九腔十八調-台三線產業詩歌有聲書,作者劉惠月)
     
    油紙遮在湖脣 咇啵咇啵開
    劈竹 刨竹 遮骨
    項項竹園取
    油紙遮 枝展護眾生
     
    油紙遮在菸樓 咇啵咇啵開
    鑽孔 遮柄 遮面
    項項手工做
    油紙遮 葉茂蔭子孫
     
    油紙遮在尖山 咇啵咇啵開
    膏遮衣 畫山水 畫花鳥
    項項係藝術
    油紙遮 花開並蒂蓮
     
    油紙 有子
    紙遮 人丁興旺
    傘字四人 多子多孫
    油紙遮滿那…
    開枝散葉 打花又結子

    **台灣客語漢字尚在發展階段
    yee.y201@gmail.com
    敬請批評指教 劉惠月 敬上

    感謝以下贊助的聽眾:


    Powered by Firstory Hosting

  • 49.寒夜無過拉尿-記黑豆(選自九腔十八調-台三線產業詩歌有聲書,作者劉惠月)

    2021.05.039分鐘

    49寒夜無過拉尿-記黑豆(大埔腔,作者劉惠月)
    選自九腔十八調-台三線產業詩歌有聲書)
     
    細人麼該都當得人惜
    那講拉尿該斯得人惱
     
    寒天睡目進前 可比無屙著尿
    無當樑个尿泡 忍到三光半夜
    忍毋核 斯拉尿咧
    臭尿馦 騙毋過人
    分阿姆 用竹筱捋
     
    輒輒拉尿實在無奈何
    斯食阿姆煮个烏豆糯飯
    講烏豆屬水 利尿補腰
    有一站時間
    灶下陣陣飄來…
    烏豆 糯米 烏糖香
     
    自從食了後
    逐暗晡斯無識過拉尿
    乜親身見證
    烏豆係豆中之王
     
    烏豆糯飯味緒
    在吾心肝肚…
    久久毋會散撇
     

    台灣客語漢字尚在發展階段
    yee.y201@gmail.com
    敬請批評指教 劉惠月 敬上

    感謝以下贊助的聽眾:


    Powered by Firstory Hosting

  • 48.嘴尖尖想食番薯簽-記番薯(選自九腔十八調-台三線產業詩歌有聲書,作者劉惠月)

    2021.04.2010分鐘

    48.嘴尖尖・想食番薯簽-記番薯(大埔腔,作者劉惠月)
    (選自九腔十八調-台三線產業詩歌有聲書)
     
    嘴圓圓,勉強食番薯飯
    物資無豐湧年代 無飯好食
    飯甑肚个番薯 比飯還較多
    有好食 斯愛偷暢咧
    番薯飯 勉強食落肚
     
    嘴嘟嘟,刻耐食番薯葉
    堵著荒年該滿 改無番薯好食
    桌面頂毋係番薯葉 斯係豬菜
    摘番薯葉 餵豬豬菜
    番薯葉 刻耐食落肚
     
    嘴尖尖 想食麼該東西
    好額个年代 油濟濟食忒多
    刨絲 曬日頭个番薯籤
    窯 烳番薯 煨番薯
    番薯變桌項主角
    番薯簽跈緊風行
    嘴尖尖,想食番薯簽
     
    (台灣客語漢字尚在發展階段)
    yee.y201@gmail.com
    敬請批評指教 劉惠月
    敬上https://open.firstory.me/story/cknq6l7ys1l8s085690s25vc0?m=commenthttps://pay.firstory.me/user/ckkkswnnvfq420864rgen5ak3

    感謝以下贊助的聽眾:


    Powered by Firstory Hosting

  • 47.上城最尾一間磚窯-記磚窯(選自九腔十八調-台三線產業詩歌有聲書,作者劉惠月)

    2021.04.2010分鐘

    47上城最尾一間磚窯-記磚窯(大埔腔,作者劉惠月)
    (選自九腔十八調-台三線產業詩歌有聲書)
     
    客運駛過台8線个上城庄
    會影著車牌脣該間磚窯廠
    煙囪笐不時出火煙
    歸堆歸堆曬好个泥
    壓密 洗淨 入紅磚瓦模
    切模 堆疊 入龍窯肚燒
     
    大汗披身 滴滴滴在肩頭
    乾柴烈火 月光下燒磚胚
     
    燒出 一垤一垤个磚角
    起好 一間一間个磚屋
    紅磚泥瓦 妝點歸該山城
     
    今這下
    月光還照緊 一磚一瓦起个屋
    該間磚窯廠 眨一下目轉撇咧

    (台灣客語漢字尚在發展階段)
    yee.y201@gmail.com
    敬請批評指教 劉惠月 敬上

    感謝以下贊助的聽眾:


    Powered by Firstory Hosting

  • 46.食山花水个筍-記竹筍(選自九腔十八調-台三線產業詩歌有聲書,作者劉惠月)

    2021.04.089分鐘

    46食山花水个筍-記竹筍(大埔腔,作者劉惠月)
     (選自九腔十八調-台三線產業詩歌有聲書)
     
    山花水
    要在落雨過後
    在春雨紛飛時
    山花水 水鮮鮮
    食過滿山坪滋養
    山花水 水清清
    食著歸樹林精華
     
    食過山花水个筍
    漸漸挷想 定定挷高
    春筍贏過菜
    筍味肥過肉
     
    石牯縫肚个筍
    豺牯貪山花水
    伸長嗄變竹林

    感謝以下贊助的聽眾:


    Powered by Firstory Hosting

  • 45.回享缶響-記陶瓷(選自九腔十八調-台三線產業詩歌有聲書,作者劉惠月)

    2021.04.0810分鐘

    45回享缶響-記陶瓷(大埔腔,作者劉惠月)
     (選自九腔十八調-台三線產業詩歌有聲書)
     
    灶下  阿姆無閒都乒乒乓乓
    該兜  盆頭缽跈佢鏗鏗鏘鏘
    跈緊  釜鏍鑊缽乜叮鈴噹啷
     
    該鬧熱滾滾个做事聲
    喊醒懶睡个陶盎神
    喊醒死睡个磚窯廠
     
    瓦泥開嘴唱山歌
    燒出生活个器物
     
    陶做个大氣 香爐 缽 醃缸 飯甑
    缶做个幼秀 碗盤 杯 花盎 瓷盤
     
    厥等過一擺起工
    唱出大自然歌聲
     
    煞煞㧒撇 塑膠萬世之害
    回頭享受 缶个叮噹響聲

    感謝以下贊助的聽眾:


    Powered by Firstory Hosting

  • 44.拌楻挨礱粒粒皆辛苦(選自九腔十八調-台三線產業詩歌有聲書,作者劉惠月)

    2021.04.0810分鐘

    44.拌楻挨礱粒粒皆辛苦-記碾米(大埔腔,作者劉惠月)
     (選自九腔十八調-台三線產業詩歌有聲書)
     
    禾田項 一頭一頭个禾熟咧
    有兜人無閒濟借割禾
    有兜人將割落來个禾
    拿到斛桶打穀 手項个禾 打啊打
    拿到拌楻拌穀 手項个禾 拌啊拌
    打好 一粒粒个穀
    拌好 一粒粒个穀
     
    禾埕清淨來 好分穀曬日頭
    禾埕拚淨來 好來晒穀翻穀
     
    精米所 一籠一籠个穀排列
    用礱來同榖脫殼  挨礱 挨啊挨
    脫好殼个米脫皮  舂米 舂啊舂
    挨好 一粒一粒滋養个糙米
    舂好 一粒一粒素絲个白米
    精伸 一層一層餵雞食个糠
     
    思想起飯桌項个白米
    拌楻挨礱粒粒皆辛苦

    感謝以下贊助的聽眾:


    Powered by Firstory Hosting

  • 43.纏一蕊春花-記纏花(選自九腔十八調-台三線產業詩歌有聲書,作者劉惠月)

    2021.04.028分鐘

    43纏一蕊春花-記纏花(大埔腔,作者劉惠月)
      (選自九腔十八調-台三線產業詩歌有聲書)
     
    春花 用伸个線來做
    又安做伸花
    絲線緊纏緊縈
    又安做纏花 線花
     
    新嫁娘自家做春花
    做人面
    絲線在紙版項纏
    愛纏來靚
    絲線在鐵線項縈
    愛縈來緪
    絲線 圈核紙版 愛絞緪來
    一圈紙版 使毋得滑線縫
     
    纏一蕊紅紅个花
    纏一皮青青个葉
    再將紅花並綠葉結共下
    剪紙 編織 刺繡 做下展
    纏出多樣又豐富个飾物
    放到公廳做供品
    吊在間房肚看靚
     
    出力纏 纏出光彩个生命
    煞猛縈 縈出圓滿个人生
    纏出歸屋燦爛个婚禮來https://open.firstory.me/story/ckn04d7z9ntyv0823gjdgk7fq?m=commenthttps://open.firstory.me/story/ckn04d7z9ntyv0823gjdgk7fq?m=comment

    感謝以下贊助的聽眾:


    Powered by Firstory Hosting

  • 42.湊牲个點心-記糕餅(選自九腔十八調-台三線產業詩歌有聲書,作者劉惠月)

    2021.04.0210分鐘

    42湊牲个點心-記糕餅(大埔腔,作者劉惠月)
      (選自九腔十八調-台三線產業詩歌有聲書)
     
    祖堂項个神桌
    三牲(牛、羊、豬肉)來獻祭
    該湊牲个點心
    豐富又多樣
    拜喏拜好了後
    糕餅任你食
     
    綠豆粉做个糕
    鬆鬆軟軟融入心
    糯米做个米糕 粒粒分明粒粒Q
    添丁食新丁粄
    添丁祝福到屋家
    八月半月光餅
    團團圓圓好滋味
     
    該湊牲个點心…
    流口涎水 也愛等
    也愛盼
     
    該湊牲个零嗒…
    生活艱苦 總愛做
    總愛食 
    該湊牲个糕餅… 三線產業詩歌有聲書)
     
    祖堂項个神桌
    三牲(牛、羊、豬肉)來獻祭
    該湊牲个點心
    豐富又多樣
    拜喏拜好了後
    糕餅任你食
     
    綠豆粉做个糕
    鬆鬆軟軟融入心
    糯米做个米糕 粒粒分明粒粒Q
    添丁食新丁粄
    添丁祝福到屋家
    八月半月光餅
    團團圓圓好滋味
     
    該湊牲个點心…
    流口涎水 也愛等
    也愛盼
     
    該湊牲个零嗒…
    生活艱苦 總愛做
    總愛食
     
    該湊牲个糕餅…
    表現祖訓 神在廟 祖在堂
    表現祖訓 神在廟
    祖在堂

    感謝以下贊助的聽眾:


    Powered by Firstory Hosting

  • 41.尋無三角圓-記三角圓(選自九腔十八調-台三線產業詩歌有聲書,作者劉惠月)

    2021.04.0210分鐘

    41.尋無三角圓-記三角圓(大埔腔,作者劉惠月)
     (選自九腔十八調-台三線產業詩歌有聲書)
     
    正對車頭落車
    遽遽行到對面該條巷
    想尋自細食到大个三角圓
    遠遠看著麵攤有寫緊三角圓
    偎兼去看…
    灶下無人 鑊頭冷冷
    登時有一个人客乜來尋味
    兩個人面對面
    加添因致店門無開个失望感 
    食毋著三角圓
    心肝開始疑狐:做嘛無賣咧
    跈緊開始愐講:
    做嘛厥名真矛盾
    有三角 又有圓
     
    便利粉/番薯粉摻共下
    再用滾水熝 共下亼
    過撚做三角形个粄
    食了會尋尾
    毋過這滿嗄尋毋著尾咧遽遽行到對面該條巷
    想尋自細食到大个三角圓
    遠遠看著麵攤有寫緊三角圓
    偎兼去看…
    灶下無人 鑊頭冷冷

    登時有一个人客乜來尋味
    兩個人面對面

    加添因致店門無開个失望感
     
    食毋著三角圓

    心肝開始疑狐:做嘛無賣咧
    跈緊開始愐講:
    做嘛厥名真矛盾
    有三角 又有圓
     
    便利粉/番薯粉摻共下
    再用滾水熝 共下亼
    過撚做三角形个粄
    食了會尋尾
    毋過這滿 嗄尋毋著尾咧
    尋毋著東勢人共同个味緒
    毋過這滿 嗄尋毋著尾咧
    尋毋著東勢人共同个味緒

    感謝以下贊助的聽眾:


    Powered by Firstory Hosting

  • 40.外阿婆个貼身嫁妝-記燻油(選自九腔十八調-台三線產業詩歌有聲書,作者劉惠月)

    2021.03.2211分鐘

    40外阿婆个貼身嫁妝-記燻油(大埔腔,作者劉惠月)
    (選自九腔十八調-台三線產業詩歌有聲書)

    在梳妝臺前梳頭整妝个外阿婆
    用篦同頭那毛一支一支梳齊來
    緊梳頭緊唱梳妝臺 哪噯呦嘟呦
    頭那毛搽燻油了後變亮線咧
    再將頭那毛束起來
    盤出一蕊烏金烏金个髻鬃花
    思想起啊思想起 燻油哪位來 呦呦嘟呦


    罐肚裝火油 放入挖好个泥空肚
    陶罐裝淰燥樹疕 放在油罐面頂盦盦覆
    粗糠掖在膏好泥漿个兩層罐四圍
    粗糠點著來 火煙熻三四日
    定定等樟樹疕精華滴入火油罐
    思想起啊思想起 燻油這位來 呦呦嘟呦


    外阿婆逐日用个篦並燻油
    總下係佢行嫁時个貼身嫁妝
    燻油搽圓身 康健身體
    佢去到哪 就跈佢香到哪
    今這下个燻油 跈時行風潮繼續飄香

    感謝以下贊助的聽眾:


    Powered by Firstory Hosting

  • 39.不見採桑人-記蠶絲(選自九腔十八調-台三線產業詩歌有聲書,作者劉惠月)

    2021.03.2210分鐘

    39不見採桑人-記蠶絲(大埔腔,作者劉惠月)
    (選自九腔十八調-台三線產業詩歌有聲書)

    桑園肚 工人當在採桑葉
    桑葉拿轉去分蠶食
    春蠶多食葉 贏著腹中絲
    蠶繭 一圈一圈圍
    蠶包 一粒一粒結
    繅絲 一絲一絲抽
    蠶絲 萬丈萬丈出

    摸核一領蠶絲被
    愐著該萬粒蠶包

    兩个平平會牽絲
    春蠶密密織 蜘蛛結網疏

    兩个平平會結蟲包
    蠶繭每利人 蝲䗁繭無用
    蠶飽忙絲課 蜂飽採蜜去

    桑園肚桑葉當密
    樣脣 蠶吂老…
    不見採桑人

    感謝以下贊助的聽眾:


    Powered by Firstory Hosting

  • 38.面帕粄店-記粄條(選自九腔十八調-台三線產業詩歌有聲書,作者劉惠月)

    2021.03.2210分鐘

    38面帕粄店-記粄條(大埔腔,作者劉惠月)
    選自九腔十八調-台三線產業詩歌有聲書)

    行入該間面帕粄店
    頭家歡喜展厥炊粄手藝
    佢點著灶頭項个樵火
    等鑊肚个水滾了後
    手藝斯開始舞起來…

    滾水面頂架一個平鐵盤
    鮮粉漿 定定孔入盤項
    粉漿堵到燒熝熝个水氣
    慢慢熟…
    慢慢變透明…

    平鐵盤肚个粄熟咧
    炊好个粄 在脣項放涼
    面帕粄還氣湧湧
    同佢拔在竹篙項
    粄香味…
    陣陣飄散
    滾水變少 過敨兜冷水
    這齣風神个手藝繼續舞

    該盤面帕粄 毋盼得切開
    過較毋盼得…
    這無人傳承个手路

    感謝以下贊助的聽眾:


    Powered by Firstory Hosting

  • 37.有那無个玻璃-記玻璃文創(選自九腔十八調-台三線產業詩歌有聲書,作者劉惠月)

    2021.03.1310分鐘

    37有那無个玻璃-記玻璃文創(大埔腔,作者劉惠月)
    (選自九腔十八調-台三線產業詩歌有聲書)
    像有形…
    又像無形…
    有那無个玻璃
    可比 滑溜个面項缺一角
    那係 金金个面項變濛濛
    那講 透明个圓身有碎痕
    玻璃那打爛撇 乓玲乓啷…
    恁泥斯定著知 這位有玻璃
    分玻璃存在个幾種意義
    雕刻…圍牆 屏風…展現厥个堅耐
    熔製…圓子 圓珠…展現厥个溫和
    添色…花盎 看靚…展現厥个藝術
    像有形…又像無形…
    有那無个玻璃 繼續伊囥人尋

    感謝以下贊助的聽眾:


    Powered by Firstory Hosting

  • 36.牡丹花蕊蕊開-記花布服飾(選自九腔十八調-台三線產業詩歌有聲書,作者劉惠月)

    2021.03.1310分鐘

    36牡丹花蕊蕊開-記花布服飾(大埔腔,作者劉惠月)
    (選自九腔十八調-台三線產業詩歌有聲書)
    對阿婆个記憶 寒天時盡清楚
    歸屋家人共下弇一領大棉被
    阿婆總係睡盡壁角
    細人在眠床頭同被單揪一下
    阿婆个背曩項斯黏時冷沁沁
    毋過 惜孫个佢
    緊鼻印在被單項个牡丹花
    耐過幾下擺冷風入骨寒夜
    前一駁 當時行著花布衫
    街路項 一蕊一蕊个牡丹花
    歸大蕊歸大蕊緊開
    打都盡奢華 盡惹目
    打都滿那鬧熱濟借
    牡丹花分結婚典禮變到當排場
    新娘同新娘公 開容笑面迎賓客
    這滿 含蓄个阿婆睡醒咧
    佢恬恬賞 牡丹花个靚
    恬恬收藏 牡丹花个香
    收藏在家飾个一細角
    裝飾在衫褲个細垤布
    在衫袋項个滾邊
    牡丹花還係…
    蕊蕊開 定定飄香

    感謝以下贊助的聽眾:


    Powered by Firstory Hosting

  • 35.儕儕都係香妃-記香皂(選自九腔十八調-台三線產業詩歌有聲書,作者劉惠月)

    2021.03.1310分鐘

    35儕儕都係香妃-記香皂(大埔腔,作者劉惠月)
    (選自九腔十八調-台三線產業詩歌有聲書)

    阿奶擐一錫桶个衫褲 去河壩洗
    佢兩隻腳浸入水竇
    面向洗衫石 屎胐對緊河壩
    手項拿一隻棍 打衫褲
    該擣衣聲 一聲一聲打
    該茶箍水 一滴一滴流
    歸條河壩 陣陣茶籽香飄散
    阿姐去崎下拈幾粒木浪子
    共款兩隻腳浸入水竇
    面向河壩上游 屎胐對緊水尾
    用木浪子 洗頭拿毛
    該洗頭拿毛聲 一聲一聲爪
    該木浪子个波 一波一波流
    歸條河壩 陣陣木浪子香飄
    這滿个人 在浴堂洗身
    香茶箍洗啊洗 面帕鑢啊鑢
    洗都歸間噴香 洗都歸身飄香
    儕儕都係香妃

    感謝以下贊助的聽眾:


    Powered by Firstory Hosting

  • 34.曬鹹淡-記醃漬(選自九腔十八調-台三線產業詩歌有聲書,作者劉惠月)

    2021.03.1310分鐘

    34曬鹹淡-記醃漬(大埔腔,作者劉惠月)
    (選自九腔十八調-台三線產業詩歌有聲書)
    曬鹹淡 麼該都使得拿來曬
    曬鹹淡 麼該都使得拿來滷
    冬下頭 趁日頭烈烈 曬大菜
    大菜歡唱三部曲…
    先唱名鹹菜 再唱福菜
    盡尾唱罷鹹菜乾
    炒 滷 炆…做下好滋味
    收冬時 趁日頭猛猛 曬菜頭
    菜頭歡唱三部曲…
    先唱名菜頭囹 再唱菜脯乾
    盡尾唱罷蘿蔔錢
    炒 滷 炆…做下好味緒
    熱天時 趁有日頭花 曬豆乾
    長莢豆 短豆 敏豆 做下曬得
    曬鹹淡 用四炆四炒展手路
    曬鹹淡 有食當思無食个苦

    感謝以下贊助的聽眾:


    Powered by Firstory Hosting

  • 33.麼人毋記得該酒甕-記醋(選自九腔十八調-台三線產業詩歌有聲書,作者劉惠月)

    2021.03.0611分鐘

    33麼人毋記得該酒甕-記醋(大埔腔,作者劉惠月) (選自九腔十八調-台三線產業詩歌有聲書)

    麼人毋記得該梅酒甕
    無人惜个梅 同厥目汁滴落甕肚
    歸甕酒過定定發酵
    緊滷緊轉酸 緊滷緊入味
    浡出个梅醋 在空中陣陣飄香

    麼人毋記得該桑垂酒甕
    無人惜个桑垂 同厥目汁滴落甕肚
    歸甕酒又定定發酵
    緊滷緊轉酸 緊滷緊入味
    溢出个桑垂醋 在園肚陣陣飄香

    麼人毋記得該黃梨酒甕
    無人惜个黃梨 同厥目汁滴落甕肚
    歸甕酒還定定發酵
    緊滷緊轉酸 緊滷緊入味
    淰出个黃梨醋 在灶下陣陣飄香
    無細義滷个酸醋
    滴滴清香落玉盤
    飄來陣陣醋甕香
    說盡靚靚个錯誤

    感謝以下贊助的聽眾:


    Powered by Firstory Hosting

  • 32.貯香味-記香水(選自九腔十八調-台三線產業詩歌有聲書,作者劉惠月)

    2021.03.0610分鐘

    32 貯香味-記香水(大埔腔,作者劉惠月)
    (選自九腔十八調-台三線產業詩歌有聲書)

    同若香水味 貯起來
    等妳偷偷對吾正手片行過
    若髻鬃花香 飄啊飄時
    用鼻公同妳牽到轉來

    同若胭脂味 貯起來
    等妳偷偷對吾頭前行過
    若白鶴花香 飄啊飄時
    用鼻公同妳牽到轉來

    同若粉膏味 貯項來
    等妳偷偷對吾後背行過
    若油桐花香 飄啊飄時
    用鼻公同妳牽到轉來
    毋使疑狐 毋使亂揣
    吾个好鼻師名聲傳揚國際
    吾个好鼻詩雅趣 讚頌文人
    同所有个香味 貯項來
    分大家發現 客家个靚

    感謝以下贊助的聽眾:


    Powered by Firstory Hosting

  • 31.攬清香-記薄荷油(選自九腔十八調-台三線產業詩歌有聲書,作者劉惠月)

    2021.03.0610分鐘

    31攬清香-記薄荷油(大埔腔,作者劉惠月)
    (選自九腔十八調-台三線產業詩歌有聲書)

    天庭項 搽一屑薄荷油
    歇睏一下… 伸下懶筋
    攬入歸片藍天

    脢盎脣 搽一屑薄荷油
    放尞一下… 捶下背囊
    攬入歸座森林
    鼻公脣 搽一屑薄荷油
    敨下大氣 攬入歸條河壩

    毋管你這滿…
    去目䁯䁯 抑係目
    黏時分你 目金金 笑嘻嘻
    毋管你這滿… 悿都目澀澀
    或者目西西
    跈緊分你 牙西西 笑嘻嘻
    該提神醒腦个薄荷油
    使得攬入歸日个清香

    感謝以下贊助的聽眾:


    Powered by Firstory Hosting

  • 30.苦力娘(選自九腔十八調-台三線產業詩歌有聲書,作者劉惠月)

    2021.03.0210分鐘

    30.苦力娘-記苦茶油(大埔腔,作者劉惠月)
    (選自九腔十八調-台三線產業詩歌有聲書)

    借問苦茶樹 若个人生到底有幾艱苦
    樣脣恁泥分人安這苦蒂蒂又苦篤篤个名
    從樹頭到樹尾 
    茶子樹做下係苦 苦啊苦 苦啊苦…
    敢使得同你安一個偏名 苦力娘

    年冬時節 山項个茶籽收成該滿
    苦力娘歸日唱緊該條古老个山歌
    苦啊苦 苦啊苦…
    跋過嶇嶇个山崎 
    又越過長長个大崎
    細粒个茶籽用手一粒一粒摘
    苦力娘歸日做都兩頭烏
    摘落來个茶籽愛榨油該滿
    苦力娘又歸日唱緊該條山歌
    苦啊苦 苦啊苦…
    大大力推 油一屑一屑出
    大大力 油一滴一滴流
    流到天光 正淰淰一桶忑等
    苦力娘還係緊唱 
    苦啊苦 苦啊苦…

    苦茶油用老祖先个智慧帶出客家个靚款
    苦茶油用老祖先个堅耐帶出客家个未來
    今這下食麵線愛攪茶油
    洗頭拿毛愛用佢潤頭拿毛
    識貨个人同佢安做液體黃金
    厥个高質不飽和脂肪酸 
    又分人安做東方个橄欖油
    這滿苦力娘毋使再唱苦啊苦咧

    感謝以下贊助的聽眾:


    Powered by Firstory Hosting

  • 29.藍染風華(選自九腔十八調-台三線產業詩歌有聲書,作者劉惠月)

    2021.03.0210分鐘

    29-藍染風華-記藍染(大埔腔,作者劉惠月)
    (選自九腔十八調-台三線產業詩歌有聲書)

    這生人毋識紅過 
    嗄比紅還較紅 前半生 
    毋識離開土地 下半生 
    在土地項展風華
    幾世紀前个踏石還恬恬睡在地泥項
    等緊識貨人來相知相惜
    等緊識貨人來打藍製靛
    順續等緊眾人來妝點厥人生
    借問 愛樣脣同你喊醒呢
    恁泥就先對歸片青青个木藍起勢啦
    種菁製靛 就係一步一腳印个過程
    復育木藍 又係復興藍染風華開頭
    藍染風華 帶出客家原鄉燦爛个文化
    藍染愛幾靚 就愛看師傅技法有幾多變化
    攣紮藍染(紮染、絞染、絞纈) 
    藍白分明 型糊藍染(灰纈、藍印花布) 
    浪漫多姿 畫蠟藍染 
    像有又像無 板夾藍染 
    層次豐富又多變
    該年愛行嫁个細妹講 
    佢愛辦一場藍藍个婚禮 佢行去染坊 
    擇中意个染青布疋
    自家學裁縫做大襟衫
    佢還記得同紅色布攣在衫袖項
    攣出喜洋洋鬧熱濟借个婚禮
    前去祝賀个親友乜共款藍
    上著大襟衫 藍藍寬寬款款動
    下著大襠褲 藍藍鬆鬆飄飄行
    藍染 染出客家服裝萬種个風華
    藍染 染出客人祖先開疆闢土个風霜

    感謝以下贊助的聽眾:


    Powered by Firstory Hosting

  • 28.飛毋轉去个蜂(選自九腔十八調-台三線產業詩歌有聲書,作者劉惠月)

    2021.03.0210分鐘

    28飛毋轉去个蜂-記蜂蜜(大埔腔,作者劉惠月)
    (選自九腔十八調-台三線產業詩歌有聲書)

    菜園肚放一隻蜂箱
    過買來歸套畜糖蜂个傢伙
    過捉一隻蜂王放入蜂箱肚
    工蜂斯歸日無閒出門採蜜
    糖蜂毋食人間糧
    玉露為酒花為糧
    採來蝦公腳花粉
    空氣散發青草香
    採來牛眼花粉
    牛眼蜜香散毋去

    蜂箱肚个蜂蟲 食著滋養定定大
    歸竇个蜂 享受工蜂煞猛个蜂糖
    人類乜順續分著伸个蜂糖食
    蜂滿那採花粉 釀花蜜
    油籮蜂門口掌 食糖蜂
    隔壁園緊射藥 種青菜
    蜂斯恁泥幾下重个打擊
    蜂無閒採花蜜 茫茫花海 痴情不變
    出門愛採花蜜 分門口个油籮蜂咬死
    食著藥个糖蜂 中毒尋無著路飛轉去
    蜂糖緊來緊少
    蜂王同蜂蟲戇戇等 該兜飛毋轉去个蜂…
    敢知蜂竇肚个親人
    還等緊你轉屋家

    感謝以下贊助的聽眾:


    Powered by Firstory Hosting

  • 27.市場賣豆腐个客人-記豆腐 (選自九腔十八調-台三線產業詩歌有聲書,作者劉惠月)

    2021.02.2510分鐘

    27市場賣豆腐个客人-記豆腐(大埔腔,作者劉惠月)
    (選自九腔十八調-台三線產業詩歌有聲書)

    該日去市場買豆腐來湊牲
    遠遠聽到豆腐攤个頭家 用華語大聲喊: 「來買新鮮的豆腐喔」…
    「從新竹載來的喔」…
    「又香 又嫩」…
    一聽斯知 佢有當濃个客家腔…
    嘴嘟嘟 想食鹹豆腐
    豆腐好食 功夫深
    焗酒磨豆腐,到老毋敢展師傅
    客人做个豆腐無馬虎
    無論鹵水豆腐或者石膏豆腐
    不軟不硬 不長不短 做下上等貨
    黃豆浸透 打磨做豆奶 煮豆奶
    淋入鹵水 幾分鐘後 凝結變豆腐花
    豆腐花榨燥來 斯係豆腐
    嘴嘟嘟 想食磨豆腐
    豆腐好食 功夫多
    賣豆腐个客人 半夜想該千條路
    天光本本慣勢賣豆腐
    單淨愐計謀 毋當動手做
    好得佢繼續賣 吾屋家豆腐正毋會斷

    感謝以下贊助的聽眾:


    Powered by Firstory Hosting

  • 26.天香-記沉香(選自九腔十八調-台三線產業詩歌有聲書,作者劉惠月)

    2021.02.2510分鐘

    26.天香-記沉香(大埔腔,作者劉惠月)
    (選自九腔十八調-台三線產業詩歌有聲書)

    天香 天公伯个禮物
    係送分沈香樹个凝油珍寶
    沈香樹著傷了後
    自家恬恬凝油修復
    恬恬分泌个芳香樹脂
    一般人同厥名安做沉香
    沈香 係對沈香樹凝來
    牛黃 係對黃牛身項取
    橡膠 係對橡膠樹割來
    沈香樹樹心个油脂腺
    增添沉香色目並香味
    黃牛膽結石提煉个牛黃
    黃金色相使得清熱解毒
    沉香講究 醹 沉 香
    沉香使得 淨 沉 定
    這滿文人雅士最時行个…
    去沉香園區聚總
    追求香道 崇尚天香

    感謝以下贊助的聽眾:


    Powered by Firstory Hosting

  • 25.思想起肉桂枝糖(選自九腔十八調-台三線產業詩歌有聲書,作者劉惠月)

    2021.02.2310分鐘

    25思想起肉桂枝糖-記肉桂(大埔腔,作者劉惠月)
    (選自九腔十八調-台三線產業詩歌有聲書,文化部補助)

    該像枝冰樣 含在嘴項个枝糖
    多年了後… 還係 留在吾舌嫲項
    本本 留在吾記憶肚
    散毋撇… 無添忘撇…
    雜貨店買得著个枝糖
    係細人盡奢華个零嗒
    甘糖在嘴項食撇了後
    伸个肉桂嫩枝正係主角
    佢 樹皮甜甜又帶一屑辣味
    佢 樹皮緊食會變蝓蝓膏膏
    佢 樹皮做下吞落肚正甘願
    該當時 衫袋肚放兜肉桂葉
    有閒時 肉桂葉放入嘴項噍
    越噍越生津 越噍越毋驚寒
    越噍越滿足 越噍越心花開
    多年了後… 佢還係在生活肚缺席
    思想起 該枝糖个肉桂嫩枝
    思想起 該毋使加工个零嗒

    感謝以下贊助的聽眾:


    Powered by Firstory Hosting

  • 24種一頭人情樹-記木瓜(大埔腔) (選自九腔十八調-台三線產業詩歌有聲書,作者劉惠月)

    2021.02.239分鐘

    24種一頭人情樹-記木瓜(大埔腔,作者劉惠月)
    (選自九腔十八調-台三線產業詩歌有聲書,文化部補助)

    阿姆在圳溝脣種一頭木瓜樹
    佢逐日用長杓嫲舀圳溝水淋
    木瓜葉 緊生緊大皮
    木瓜花 緊打緊芳香
    木瓜果 細粒細粒結
    細人番綻… 在吂熟水个木瓜割一刀
    白色奶汁… 像樹奶樣一滴一滴緊流
    人人笑講… 奶瓜打恁結 使得飼飽當多嬰兒
    木瓜轉紅熟咧 摘兜送分人
    阿姆个人情好 食木瓜也甜
    厥好人情 鄰舍間有來有去
    其實阿姆種該係…
    一頭人情樹

    感謝以下贊助的聽眾:


    Powered by Firstory Hosting

  • 23.猴嘰哩毋食个果子(選自九腔十八調-台三線產業詩歌有聲書,作者劉惠月)

    2021.02.2311分鐘

    23猴嘰哩毋食个果子-記檸檬(大埔腔,作者劉惠月)
    (選自九腔十八調-台三線產業詩歌有聲書,文化部補助)

    天甫光時 鄰舍大嫲聲哀哀滾…
    還孤盲 果子又少撇幾粒…
    定著係猴嘰哩做个好事…
    該大聲胲咒孤罵絕 傳遍社區
    自溜里來當溫和个人
    堵到恁泥衰運 也奈佢毋何
    吾屋家窗門框 還有山猴做个記號
    該留落來个手爪痕 條條分明
    看得出來 山猴厥等識來拜訪
    天光了後 去果子園巡巡啊咧
    有影 吾果子乜少撇幾下粒
    毋過 該幾頭檸檬樹還好好
    刺人个竻 保護檸檬
    山猴嘰哩 無恁該食
    愛閃過竻 當費神摘
    唯一收成个檸檬 樹椏多竻又多情
    永久等主人來惜

    感謝以下贊助的聽眾:


    Powered by Firstory Hosting

  • 22.種一廂黃梨-記鳳梨(選自九腔十八調-台三線產業詩歌有聲書,作者劉惠月)

    2021.02.2010分鐘

    22種一廂黃梨-記鳳梨(大埔腔,作者劉惠月)
    (選自九腔十八調-台三線產業詩歌有聲書)

    該係一擺無睹好種黃梨个緣分
    眾人歡歡喜喜 㓾黃梨來食
    食伸个黃梨葉 儘儘採採擲
    毋知過撇幾久 黃梨葉綻筍
    綻筍个黃梨葉 拿去菜園肚
    判胚死種落去 種落黃梨緣
    尖尖刺人个硬葉 葉葉帶兩排利鋸
    皮面頂生个麟殼 親像火鳳凰个樣
    麟殼多邊六角形 中央利劍會刺人
    等到皮肉轉黃時 酸甜滋味盡餳人
    種一廂黃梨 花開花謝隨人賞
    種一廂黃梨 果結果落任人嚐

    感謝以下贊助的聽眾:


    Powered by Firstory Hosting

  • 21.水果頭-記枇杷(選自九腔十八調-台三線產業詩歌有聲書,作者劉惠月)

    2021.02.2010分鐘

    21水果頭-記枇杷(大埔腔,作者劉惠月)
    (選自九腔十八調-台三線產業詩歌有聲書)

    舊曆年正過撇… 主人打開紙袋花定收成
    頭一枋好摘个果子 在山排項等緊…
    紙袋花肚 寶貝一個一個尋
    粒粒金黃 摘盡枇杷一樹金
    細心剪落 打當結實个枇杷
    太平枇杷熟 頭頭果子香
    果粒圓又太 粒粒色水靚
    絨毛長又密 萋萋好㪐蒂
    果肉酸甜味 軟軟多汁湯
    皮皮葉摘來 枇杷膏入藥
    舊曆年大出个水果頭
    滋滋甜味食到春耕時

    感謝以下贊助的聽眾:


    Powered by Firstory Hosting

  • 20.一弓弓蕉-記香蕉.(選自九腔十八調-台三線產業詩歌有聲書,作者劉惠月)

    2021.02.1011分鐘

    20一弓弓蕉-記香蕉(大埔腔,作者劉惠月)
    (選自九腔十八調-台三線產業詩歌有聲書)

    屋脣種一頭弓蕉 種來看靚
    日日看佢緊生 看佢緊挷長
    貓會來抵雨 筍蛄乜輒輒來尋食
    熱天時風合雨 緊打著弓蕉葉
    該蝓蝓又牽絲个莖 橫來橫去
    對屋家該扇窗門影啊出去
    弓蕉樹搖都像跳舞女郎樣
    歸串个花苞緊向地泥生
    毋過弓蕉無跈厥等生往下
    堅韌个弓蕉自家弓向日頭光
    弓蕉花謝撇 弓蕉還係日日弓大
    看厥色 對嫩青轉金黃色
    鼻厥味 對酸澀轉甜密香
    一弓弓蕉 吊核五六枇(托)弓蕉
    一枇(托)弓蕉 托核十外條弓蕉
    熟水个弓蕉香 對窗門飄入屋肚
    一弓弓蕉味緒 對桌項送到鄰舍

    感謝以下贊助的聽眾:


    Powered by Firstory Hosting

  • 19.車頭脣賣包粟个伯姆(選自九腔十八調-台三線產業詩歌有聲書,作者劉惠月)

    2021.02.1010分鐘

    19-賣包粟个伯姆-記玉米(大埔腔,作者劉惠月)
    (選自九腔十八調-台三線產業詩歌有聲書)

    車頭脣有兩擔賣東西个伯姆
    該兜燒熝熝个煠包粟盡銷頭
    毋管熱燁燁 無斯寒溜溜个天時
    不管時看得著厥等無閒个身影
    車頭人出出入入
    路項車來來去去
    細車頭無麼好買
    單淨這兩擔忒寧
    看著燒氣衝往上 庄民斯相爭來買
    包粟一穗一穗賣 銀錢一箍一箍賺
    正買來个包粟 愛細意拿莫熝傷
    愛一層一層同包粟殼剝撇
    將一絲一絲个包粟絲挷撇
    再一排一排摎包粟退落來
    過一粒一粒將包粟粒擘開
    這滿還吂且 吂得時食
    盡好再將包粟粒个薄膜擘撇
    慢慢噍 緊噍緊香 越噍越甜
    一穗包粟使得食歸日
    該物資無豐湧个年代
    車頭脣賣包粟个伯姆
    係該甜香包粟个味緒

    感謝以下贊助的聽眾:


    Powered by Firstory Hosting

  • 18.分雪花唚過个花香(選自九腔十八調-台三線產業詩歌有聲書,作者劉惠月)

    2021.02.109分鐘

    18分雪花唚過个花香-記茶花(大埔腔,作者劉惠月)
    (選自九腔十八調-台三線產業詩歌有聲書)

    對面山頭項 種有歸排个茶花
    日頭下个葉 表現都油金油金
    無儘採放棄 日頭花个一絲光
    逐日認真生 享山川大地精華
    毋使人來照顧 還生都皮皮青
    濛沙煙逐朝晨 同佢梳妝打扮
    寒天飄來雪花 同佢唚一下嘴
    茶花清醒過來 佢伸一下腰骨
    用多摺个花瓣 細義來挶雪花
    寒天打花時 相賽湊伴遶山花
    雪花飄啊飄 飛去分人嘖嘖滾
    茶花打啊打 靚去分人唷唷滾
    在茶花下醉初醒 嗄錯過日頭落山
    千錯萬錯 總愛怪怨該…
    分雪花唚過个花香

    感謝以下贊助的聽眾:


    Powered by Firstory Hosting

  • 17.神豬嘴項銜緊該粒柑(選自九腔十八調-台三線產業詩歌有聲書,作者劉惠月)

    2021.02.1011分鐘

    17.神豬嘴項銜緊該粒柑-記柑橘(大埔腔,作者劉惠月)
    (選自九腔十八調-台三線產業詩歌有聲書)

    大神豬嘴項銜緊一粒柑
    佢弓緊身體 實在柑(甘)願食
    味緒樣脣樣 單淨神豬知忒寧
    毋過厥山豬親戚定著識嚐過
    哪時 哪項 哪搭位?
    斯在柑園肚个柑 打當結該滿
    柑忒過重 隨風晃來晃去
    盡尾當毋著 歸波墜落來
    圓滾滾个柑 跈緊做下㪐蒂
    跌到地泥項 堆打堆
    歸堆个柑香 飄啊飄
    圓羅羅个柑 滾啊滾
    擘開柑來看 一㼓㼓
    放入嘴空嚐 酸丟丟
    經過幾下日个風吹日炙 雨淋雨涿
    柑做下變都綿綿 變都酪酪酪
    該臭風又臭餿味 同山豬擛手
    餳來歸竇个山豬 同人搶柑食
    山豬同柑 高不將个選擇
    山豬同人 散毋撇个冤仇
    毋過佢永久搶毋走….
    神豬嘴項銜緊…
    該粒柑

    感謝以下贊助的聽眾:


    Powered by Firstory Hosting

  • 16.門外棗花飄-記紅棗(選自九腔十八調-台三線產業詩歌有聲書,作者劉惠月)

    2021.02.1010分鐘

    16.門外棗花飄-記紅棗(大埔腔,作者劉惠月)
    (選自九腔十八調-台三線產業詩歌有聲書)

    夏季時 園主在棗樹下無閒
    棗樹打花 陣陣花香 飄啊飄
    棗花 星宿 緊在園項 啊
    夏桂 星光 星瀉屎樣 金金金
    庄頭个樹椏 打歸排个棗花
    棗庄个園主 暗算生幾多棗
    毋打眼个棗花 這時節盡分人關注
    一年度个收成 斯靠棗花煞猛鼓開
    遊客來棗樹下賞花 花樣玲瓏
    賞花又順續來鼻花 花蜜清香
    等啊等 賞啊賞 看啊看 等到棗花謝撇
    一粒一粒个棗生咧 賞著棗枝靚款
    一枝一枝个梅枝樣 看著曬棗色目
    一排一排个青並紅 星光半夜時
    門外棗花飄 陣陣花香飄 池中荷葉生

    感謝以下贊助的聽眾:


    Powered by Firstory Hosting

  • 15.檀香燒撇一爐灰-記檀香(選自九腔十八調-台三線產業詩歌有聲書,作者劉惠月)

    2021.02.1011分鐘

    15.檀香燒撇一爐灰-記檀香(大埔腔,作者劉惠月)
    (選自九腔十八調-台三線產業詩歌有聲書)

    起鼓咧 … 廟坪看大戲个人尖淰淰
    香公點著神桌前个檀香
    渟茶 緊看香煙升往上
    檀香 燒撇一爐灰
    檀灰 落爐暗自焚 該思念…
    薰香 留在古琴尾 該噴香…
    餘暖 繼續檀琵琶
    紙灰聖蹟亭中清
    檀香燻過白紙包
    倉頡牌前暫借放
    擇日紙灰送河壩
    古人焚香操琴 解危機
    今人薰香品茶 望安神
    香客燒香跌筊 求平安
    煞鼓咧 … 神桌前 拜喏个人散撇去
    戲棚下 看戲个人毋肯煞 總係…
    檀香燒撇一爐灰 人間春色在檀心

    感謝以下贊助的聽眾:


    Powered by Firstory Hosting

  • 14.㪐核又回甘个綠寶石-記橄欖(選自九腔十八調-台三線產業詩歌有聲書,作者劉惠月)

    2021.02.0910分鐘

    14.㪐核又回甘个綠寶石-記橄欖(大埔腔,作者劉惠月)
    (選自九腔十八調-台三線產業詩歌有聲書)

    圓身兩頭尖… 真勘得擔硬个事頭
    硬確確个核… 吞毋落胲不公不義
    牛角毋尖毋過村 橄欖無熟毋落嘴
    萬事自然有定數 無麼个好想毋解
    酸久久 該係吂圓融个人情
    澀擊擊 該係吂滑溜个人生
    苦蒂蒂 該係吂轉甜个人味
    橄欖 像雅士,外圓 內拶腹
    㪐核 又熟絡,萬事 好參詳
    嚐食 澀後甜,鼻味 清又芳
    傍酒 解酒毒,入茶 助茶香
    榨油 滴滴醇,生機 健康貨
    滋養又食了後會尋尾
    實實在在…. 㪐核又回甘个綠寶石

    感謝以下贊助的聽眾:


    Powered by Firstory Hosting

  • 13.樹香飄散幾下世代-記木匠(選自九腔十八調-台三線產業詩歌有聲書,作者劉惠月)

    2021.02.0910分鐘

    13-樹香飄散幾下世代-記木匠(大埔腔,作者劉惠月)
    (選自九腔十八調-台三線產業詩歌有聲書)

    手路幼秀个魯班巧匠 同人起枋屋
    厥姆 厥餔娘 屋家人做下來相幫
    惜子个阿姆 負責拉緊「班母」
    賢慧个餔娘 負責撳核「班妻」
    做家个餔娘 擎遮分老公抵雨
    歸屋家大細 實在和挼又鬥搭
    整桁桷、改家具、釘桌凳、補尿桶…項項有
    魯班鎖、魯班尺、墨斗、鋸、鑿……項項齊
    用鉋 同一垤一垤个枋 鉋平來
    用鋸 同一垤一垤个枋 鐐齊來
    用鑿 同一垤一垤个枋 鑿空來
    家具 全全愛鑿空鬥榫 鬥緪來
    一刀一鑿 穿過枋間細樹紋
    一空一缺 手不傷材真巧匠
    巧匠餘留寸枋片,家具幫墊定平穩
    墊木原本斧削尖,總在低處立功名
    巧匠 展開工藝精神之門
    巧藝 樹香 飄散幾下世代

    感謝以下贊助的聽眾:


    Powered by Firstory Hosting

  • 12.月光光好種薑-記薑嫲(選自九腔十八調-台三線產業詩歌有聲書,作者劉惠月)

    2021.02.0810分鐘

    12.月光光好種薑-記薑嫲(大埔腔,作者劉惠月)
    (選自九腔十八調-台三線產業詩歌有聲書)

    月光光 好種薑,薑必目 好種竹
    等待老薑嫲必目 綻出新芽時
    日暮落山來,月明上山去
    歸日薑嫲園掘泥肉 萬事毋敢喊
    一代富,靠祖公咬薑又啜醋
    月光光 好種薑,竹開花 好種瓜
    薑嫲同烏糖 唱出薑嫲茶戀情
    薑嫲同鴨公 戀出薑嫲鴨熱情
    月上隨人意,人閒月更清
    二代富,靠家業著綢衫綢褲
    月光光 好種薑,拈著一條爛冬瓜
    薑云能損心?此謗誰與雪!
    總係 朝朝早䟘四垤薑
    保證 毋使街項尋藥方
    三代富,身體康健安然自在
    無再過咬薑啜醋堅耐个人生
    月光光 好種薑,薑必目 好結親
    薑嫲秧同客家藍衫
    譜戀出一場… 世紀个薑嫲婚禮

    感謝以下贊助的聽眾:


    Powered by Firstory Hosting

  • 11.烏鑽石-記竹炭(選自九腔十八調-台三線產業詩歌有聲書,作者劉惠月)

    2021.02.0811分鐘

    11.烏鑽石(大埔腔,作者劉惠月)
    (選自九腔十八調-台三線產業詩歌有聲書)

    講你係烏鑽石 你敢會承認
    烏金烏金 頭烏面烏 前烏後烏
    較樣脣看 還係烏疏滴答
    幾十年前對日本起勢 正開始若个生命
    用竹做若个養分 用相思樹做若个火種
    一年過一年个綻筍 
    綁長 一擺又一擺个火燒 
    滅絕 該種火炙 流血 綁扯
    有麼人當得起恁泥个淬鍊
    有麼人當得著恁泥个重生
    當然係你 烏鑽石-竹炭
    對竹頭到竹尾 完全無耗爽
    從竹筱到竹篾 環保再利用
    氣體經過幾下層手續 賸落來个係竹酢水
    盡尾賸落來个成份 就係黑鑽石-竹炭
    生活肚个養生 你使得除濕、防臭、抗氧化…
    農業項个養份 你使得鬆泥、資材、營養劑…
    康健方面 你使得消除疲勞、促進血液循環、治痠疾…
    人講 前人種竹愛讓後人遮蔭 係真正个前瞻
    人講 錦上添花毋當雪中送炭 係有影个愛心
    加哪用硬逞修練个精神
    單淨用堅耐堅持个意志
    盡尾就係你贏面个人生
    今後你還愛繼續堅持若个烏鑽石好名聲

    感謝以下贊助的聽眾:


    Powered by Firstory Hosting

  • 10.長年菜之旅-記福菜(選自九腔十八調-台三線產業詩歌有聲書,作者劉惠月)

    2021.02.0610分鐘

    10.長年菜(大菜)之旅-記福菜(大埔腔,作者劉惠月)
    (選自九腔十八調-台三線產業詩歌有聲書)

    秋收春耕前 田園項罕得个奢華
    歸片青荷荷又大碼頭个景象
    係長年三十暗晡个盼望
    苦同甘 佢戇戇分無清
    鹹同酸 佢戇戇食毋出

    佢盡慶个係 一場又一場化妝舞會
    在過撇年了後 陸陸續續展開
    佢亼啊亼 撚啊撚 曬啊曬…
    使得滷鹽 加工做鹹菜
    乜使得無愛滷鹽 曬做淡乾
    日時頭 運動照日頭光
    暗晡頭 歇睏定定發酵
    佢過亼啊亼 撚啊撚 曬啊曬…
    該舞步 毋管係鹹菜 抑係淡乾
    該打扮 係覆菜(福菜)無就鹹菜乾
    做下就係厥个化妝舞步
    佢又亼啊亼 撚啊撚 曬啊曬 

    毋過… 青春愛及時賞 好花愛及時採
    六月正來賞 賞著假有心个大菜
    十二月正來採 採著傷心个大菜
    客來莫寒酸 鹹菜囥壁腳
    客走鹹菜湯 企久變主角
    盡尾 在煞鼓个化妝舞會現場
    鹹菜 淡乾 覆菜 鹹菜乾 
    總下行前來謝幕
    原來這場長年菜之旅
    係客家鹹菜型民族性个基因之旅

    感謝以下贊助的聽眾:


    Powered by Firstory Hosting

  • 09.細遮下个等望-記高接梨(選自九腔十八調-台三線產業詩歌有聲書,作者劉惠月)

    2021.02.0611分鐘

    09.細遮下个等望-記高接梨(大埔腔,作者劉惠月)
    (選自九腔十八調-台三線產業詩歌有聲書)

    佢擎緊細遮巡梨樹
    白雪雪个花海妝點歸個梨園
    心肝肚勞瀝「高接梨之父」做个媒人
    水分飽滿个幼梨對隔海遠遠過來
    為著 愛同皮粗又酸个粗梨相戀…
    暗晡頭…主人用削紅剪 一支一支削梨紅
    過將削尖个梨紅 搵一屑石蠟
    免致水份對梨紅尾項散撇
    日時頭… 將梨紅接到粗梨樹椏項
    定定分粗梨樹椏乳哀照顧
    梨紅還吂打花前 先安歸園个細遮來保護佢
    恁泥斯毋驚分雨水涿到溚潦
    盼望佢使得安心打花傳香火
    可比梨紅無打花 還愛翻過
    乳哀細心細意照顧到正經貼上去
    主人斯毋使唱「梨花帶淚」咧
    佢過一擺擎緊細遮巡梨園
    滿園花開自然香 隔窗山鳥喜啼唱
    感恩行歌接紅个人 等望梨大出
    該一場梨饗之旅

    感謝以下贊助的聽眾:


    Powered by Firstory Hosting

  • 08.背家濟个單身哥-記鹹水草編織 (選自九腔十八調-台三線產業詩歌有聲書,作者劉惠月)

    2021.02.0410分鐘

    08.背家濟个單身哥-記鹹水草編織(大埔腔,作者劉惠月)
    (選自九腔十八調-台三線產業詩歌有聲書)

    有一站時間佢輒輒來屋家坐尞
    爺哀同佢三儕有講有笑
    毋過那係講著頭擺
    佢就噭到目汁濫泔,緊同爺哀會勞瀝
    因致該擺害佢險險無命…
    該日佢背家濟走山場
    嗄毋堵好岔走,尋毋著路
    歸日肚凹凹 一屑東西都無食
    行都腰拑背吊 歸身軟怠怠
    到暗昏時 肚屎餓著變背囊
    斯開始疲爬極蹶 懷疑人生
    好得盡尾吾爺哀分佢食鮮糜
    佢像係百籃肚,歸大碗糜做下分佢食淨淨
    食飽正有元氣好繼續行路
    逐擺愐起該件事情,佢斯膝頭出目汁
    佢好背鹹水草做个家濟滿那走
    一有閒斯來吾屋家打嘴鼓
    五十外歲个佢 錯過成家立業个負擔
    細妹嫁佢無飯好食 佢將就背家濟
    多子多冤愆 少子變神仙
    有一站時間 佢嗄毋識出現咧
    毋過厥个家濟 不時在吾心肝肚出現

    感謝以下贊助的聽眾:


    Powered by Firstory Hosting

  • 07吾正手个鋸疤—記竹編 (選自九腔十八調-台三線產業詩歌有聲書,作者劉惠月)

    2021.02.0411分鐘

    07吾正手个鋸疤—記竹編(大埔腔,作者劉惠月)
    (選自九腔十八調-台三線產業詩歌有聲書)

    外阿公在禾埕跍核做事
    跍落來緊看佢變把戲
    佢破竹 鋸竹 做傢俱
    緊揣 緊愐 做麼該
    佢剁竹 定寬 剖對開
    又刮青 破篾 鋸一截
    該鋸竹聲 有來有去 來來去去…
    企竹項 跈緊大鋸 來來去去…
    佢編竹材 有入有出 出出入入…
    無細意 撞著鋸齒 血流血汀…
    佢將竹材經緯橫直 緊編緊絞
    又用技法跈編織品 來去
    米籮 謝籃 畚箕 插箕 項項做
    笠嫲 祛把 魚簍 柵欄 項項有
    菜籃 籠床 毛籣 火囪 項項編
    伸落來个竹截 做摒屎用个屎摒
    歇工時坐在竹凳項 鋸弦唱山歌
    今這下該兜技巧雖然無人傳
    還記得佢唱山歌樂線个樣
    吾正手个鋸疤刻緊厥巧手藝

    感謝以下贊助的聽眾:


    Powered by Firstory Hosting

  • 06思念.隔幾下重山水-記銅鑼杭菊(選自九腔十八調-台三線產業詩歌有聲書,作者劉惠月)

    2021.02.0310分鐘

    06思念.隔幾下重山水-記銅鑼杭菊(大埔腔,作者劉惠月)
    (收錄於文化部補助出版九腔十八調-台三線產業詩歌有聲書)

    天頂,白雪雪个浮雲飄啊飄
    緊撩弄隔海超過半世紀个杭州細妹
    細妹在山頭項打花
    花海勝景靚靚等待
    心中有事急啾啾 三步當做兩步走…
    拗花會斷骨 佢忍耐落來 毋敢呻
    撿擇會溜皮 佢恬恬承受 無盎零
    炕燥會失血 佢含緊目汁 無喊疾
    九月九日時 佢焗菊花酒 啉醉咧
    心中有事急啾啾 三步當做兩步走…
    冬下頭,落一場「十一月雪」
    在雪堆斟一杯菊花茶 等待
    山前山後百花香 等待
    金菊對芙蓉姻緣 等待
    超過半世紀个誓盟
    思念.總係隔幾下重山水

    感謝以下贊助的聽眾:


    Powered by Firstory Hosting

  • 05.擺攤賣仙草个阿伯-記仙草(選自九腔十八調-台三線產業詩歌有聲書,作者劉惠月)

    2021.02.0310分鐘

    05擺攤賣仙草个阿伯-記仙草(大埔腔,作者劉惠月)
    (收錄於九腔十八調-台三線產業詩歌有聲書)

    該係921大地動前个記憶
    逐日對圳溝這片經過
    就看著阿伯在圳溝該片煮仙草个身影
    鑊肚烳个仙草乾滾咧
    白色个水氣緊噴出來
    起濛沙煙樣 阿伯同仙草乾撈起來
    過用杓嫲舀幾下杓白色醹醹个漿
    孔入還氣湧湧个仙草汁桶肚
    噴香个仙草味黏時對圳溝該片飄來
    白漿同烏色仙草汁 相戀咧
    兩人歡唱 正月思戀真思戀 打扮劉三妹…
    這對戀人定定涼 定定變醹合汔
    等加一駁仙草凝凍咧
    阿伯將烏金个仙草載去市場擺攤賣
    三輪車 (li+ a+ ga^)叩叩滾个聲緊駛緊遠
    乜載走想食仙草个冀望
    這幾年吾老公當好種仙草
    對掖種 到打花 項項學
    對收成 到曬燥 項項做
    仙草乾再放一年 分臭青味散撇
    恬恬等待一碗仙草 (涼粉草 仙人草)
    乜等緊阿伯煮仙草个味緒過慢慢飄來
    二月思戀真思戀 打扮劉三妹…

    感謝以下贊助的聽眾:


    Powered by Firstory Hosting

  • 03.該噴香个年代-記樟腦(選自九腔十八調-台三線產業詩歌有聲書,作者劉惠月)

    2021.02.0213分鐘

    03該噴香个年代-記樟腦(大埔腔,作者劉惠月)
    (收錄於九腔十八調-台三線產業詩歌有聲書)

    腦寮肚个腦丁將樹疕放入腦灶
    點火燒柴 將腦灶鍋肚个水煮滾
    油合氣連帶樟腦精透到腦炊
    陣陣香味跈緊在空中 飄啊飄
    油合氣過對腦炊透到冷卻桶
    油輕水重 水油分離 香味不離
    撈起个油 放冷凝底就係結晶个腦沙
    使得做樟腦个腦沙
    同伸落來个庫水 總下使得繼續提煉芳香
    生活肚个防蟲 防腐 止痛 賽璐珞…
    留落來產業史項台灣三寶个好名聲
    係老頭擺个腦丁甘願日夜輪班顧火
    用身體个疲勞換來免致做兵相戰運命
    這滿點一屑樟腦精油个芳香
    陣陣香味又跈緊在空中 飄啊飄
    分人永久記得該噴香个年代-樟腦王國

    感謝以下贊助的聽眾:


    Powered by Firstory Hosting

  • 04.大甲河脣該幾頭柿樹-記柿子(選自九腔十八調-台三線產業詩歌有聲書,作者劉惠月)

    2021.02.0210分鐘

    04.大甲河脣該幾頭柿樹-記柿子(大埔腔,作者劉惠月)
    (收錄於九腔十八調-台三線產業詩歌有聲書)

    該年阿爸在大甲河脣買一垤河壩田
    賣地个人又合分佢幾頭大柿樹
    春季時 柿樹打花歸園淡黃
    柿花像仙女唚嘴樣 軟聲軟斗同蜂講意愛
    夏季時 樹葉大皮又青里里
    樹葉同歸頭樹包密密
    影得著葉下戴緊細草帽个青柿
    坐在柿樹下 毋驚風吹日炙
    秋季時 結子咧 柑黃色个柿 增添滿園風采
    因致色水靚 餳來恁多鳥啾啾滾
    紅柿識帶分吾等脆蒂个人生
    有一擺發風搓做大水
    河壩拋大浪 吼吼滾
    尾蒂嗄同該幾頭大柿樹打走咧
    柿樹雖然無在 毋過打毋走該兜㪐蒂个幸福時光

    感謝以下贊助的聽眾:


    Powered by Firstory Hosting

  • 02行過該片山林-記林業 (選自九腔十八調-台三線產業詩歌,作者劉惠月)

    2021.02.0112分鐘

    02行過該片山林-記林業(大埔腔,作者劉惠月)
    (收錄於 九腔十八調-台三線產業詩歌 有聲繪本詩)

    行過該片山林 滿山趖 趖啊趖
    翻山過嶺 蹶到龍峎森林 鋸樹
    倒樹 搬樹 樹倒人閃……
    流籠 蔗架 木馬 崎陡人亡……
    倒樹工人用血汗青春換來三餐
    也分寮下帶來百外年好光景

    行過該片山林 滿山趖 趖啊趖
    對山腳下 蹶到龍崗山場 掘泥
    秧地 落肥料 … 修枝 除蔓 打地坪 …
    拖拉牯載緊上好个樹料出港
    也分山林壁角部落鬧熱起來

    過一擺行過該片林場 滿山趖
    無輸兒童樂園个人潮
    山窩肚花草開都漫山遍野
    自然教育 生態旅遊
    山離人緊來緊近 獎勵造林
    愛護地球 山繼續生養萬物

    感謝以下贊助的聽眾:


    Powered by Firstory Hosting

  • 01-註文一坵田莊花園-記打鐵(選自九腔十八調-臺三線產業詩歌,作者劉惠月)

    2021.02.0110分鐘

    01. 註文一坵田庄花園-記打鐵(大埔腔,作者劉惠月)
    (收錄於九腔十八調-臺三線產業詩歌 有聲繪本詩集)

    打鐵師傅用火鉗夾緊燒紅紅个鐵條
    趕燒趕熱在火爐項 錘啊錘
    風箱呼呼滾 呵嘻嘿 上工X 來幫襯
    佢堪得鐵屑像放煙架 火屎燦天个困境
    過將鐵條放到牛角砧面頂 錘 割 拗 ….
    錘鍊出婦人家註文个刀嫲 菜刀 剪刀…
    分人歡喜煮一餐澎沛料理

    砸身个師傅過用火鉗夾緊鐵條
    趁燒趁熱在火爐項 錘啊錘
    風箱呼呼滾 呵嘻嘿 上工X 來幫襯
    紅鐵條放到鐵砧面頂 鏗鏗鏘鏘 ….
    又放入水桶 滋滋滾浸冷
    錘鍊出耕種人註文个犁耙 钁頭 禾鐮…
    分人耕田又耕埔 毋使做到兩頭烏
    借問打鐵師傅
    敢使得先同你註文若打鐵店个傢伙
    你定著有法度鈍刀使利手
    錘鍊出分人在田庄花園肚種花又耕園
    輕鬆呵嘻嘿 上工X 鏗鏗鏘 …

    感謝以下贊助的聽眾:


    Powered by Firstory Hosting